Key: Greqia mund ta bllokojë eurointegrimin e Maqedonisë

Maqedonia është në agjendën e Bashkimit Evropian si shtet kandidat për fillimin e bisedimeve për anëtarësim, por nuk përjashtohet mundësia që Greqia të bllokoj këtë proces në samitin e 17 qershorit të Këshillit të ministrave të BE-së. Kjo pas zyrtarëve të shumtë evropian, së fundi u është paralajmëruar edhe nga ambasadori i Britanisë së Madhe në Shkup, Andrew Key, në një intervistë për radion Evropa e Lirë.
“Rregullat në sjelljen e vendimeve nuk kanë ndryshuar, pra është e mundur që një shtet anëtar i Unionit të thotë se nuk është i gatshëm për zgjerimin, veçanërisht për fillimin e bisedimeve të Maqedonisë me Bashkimin Evropian. Njëkohësisht mendoj se zgjerimi i BE-së kërkon hapa konkret nga aplikantët për përmbushjen e kritereve dhe kjo kërkon lidership, fleksibilitet dhe përkushtim të vazhdueshëm”, deklaroi Key.

I pyetur nëse mosmarrja e datës mund të refklektohet në raportet ndëretnike në Maqedoni, ambasadori britanik tha se me rëndësi është fakti se dy bashkësitë e madha etnike dëshirojnë integrimin e Maqedonisë në BE, por në të njëjtën kohë sipas tij, të gjithë duhet të jenë të vetëdijshëm se nuk ka hapësirë për dhunë dhe se Marrëveshja e Ohrit është baza më e mirë për ndërtimin e marrëdhëniet ndëretnike.

“Është shumë me rëndësi të promovohet pjesëmarrja aktive e të gjitha bashkësive etnike në zbatimin e Marrëveshjes së Ohrit. Shpresoj se liderët kur flasin për vizionin e tyre për Maqedoninë, për të ardhmen e përbashkët për Maqedoninë, do ti theksojnë këto dy pika pasi ato janë baza për të ardhmen evropiane, për një të ardhme stabile, prosperuese si shtet anëtar i NATO-së dhe BE-së”, theksoi ambasadori Key.

Ndërsa, sa i përket raportit të ardhshëm të Komisionit Evropian për përparimin e Maqedonisë, ambasadori britanik tha se vendi duhet të shënoj rezultate në sferat që ishin theksuar në raportin e vitit të kaluar. Sipas tij, gjatë muajve të ardhshëm duhet ti kushtohet vëmendje reformave në gjyqësi, administratën publike, në luftën kudër korrupsionit si dhe në miratimin e ndryshimeve në rregulloren mbi punën e Kuvendit në koordinim të plotë me partitë politike. /Alsat-M/