HTC dhe AT&T lansojnë modelin Aria

Deri sot, konkurrentët e AT&T kanë lansuar shumë modele të telefonave të mençur Android, dhe në këtë mes kompania amerikane është mjaft prapa. Mirëpo sot, kjo situatë ka ndryshuar pasi që kompanitë HTC dhe AT&T kanë lansuar modelin e telefonit të quajtur Aria.
Ky model do të bazohet në sistemin operativ Android 2.1. ndërsa telefoni do të ketë edhe ndërfaqen e HTC Sense me të cilën do të funksionojë. Versioni më i ri i HTC Sense posedon funksione të avancuara për përdorim, si për shembull funksionin e ri pinch-to-zoom, rrjetin social FriendStream dhe softuerë të tjerë të avancuar multi-medial.

Sa i përket harduerit, Aria posedon ndërfaqe WVGA TFT-LCD me 3.2 inç, dhe nëse bazohemi në madhësinë e ekranit, mund të thuhet se Aria vjen si zëvendësim për modelin Hero, i cili ka ekran me madhësi të njëjtë.

Besohet se procesori i Qualcomm me 700MHz do të mundësojë punë të shpejtë në telefon, dhe përdorim efikas të radios, lidhjes 3G, Bluetooth 2.1+EDR, GPS, Wi-Fi dhe kompasit digjital.