Kinezët kopjojnë edhe modelin Smart

Kopja kineze e modelit Smart ForTwo nën emrin Wheego LiFe EV është "alternativë" për blerësit të cilët nuk mund të përballin çmimin e blerjes së automjetit të vogël të popullarizuar. Ky automjet elektrik ka debutuar në panairin e automjeteve në Los Angeles.
Për pamjen e jashtme të Wheego LiFe EV nuk ka diçka të veçantë të thuhet, e enterieri i tij është po ashtu modest. E vetmja “çudi teknologjike” në të është CD playeri. Nxehësit standard në mënyrë opsionale mund të ndërrohen me pajisjen e aklimatizimit me pagesë shtesë prej 1.445 eurosh.

Ai futet në lëvizje nga bateria litium-jon prej 30 kWh e cila i jep fuqinë motorit elektrik 20 KF dhe moment rrotullimi 129 Nm. Automjeti me peshë prej 1.210 kilogramësh arrin shpejtësinë maksimale prej 105 km/h, gjersa mund të kalojë 161 kilometra me një mbushje të baterisë.

Wheego LiFe EV do të gjendet në treg muajin e ardhshëm, e çmimi fillestar i tij është 24.070 euro.