Zbulohet municion dhe naftë e kontrabanduar

Dogana e Kosovës njoftoi se ka konfiskuar municion dhe naftë kontrabandë në dy raste të ndara, gjegjësisht 540 fishek të kalibrit 7.62 dhe 1040 litra naftë.
Në njoftimin e Doganës së Kosovës bëhet e ditur se Njësitet e saj janë duke ndërmarrë aksione të vazhdueshme për kontrollin e kufirit si dhe të tregut të brendshëm, të cilat kanë për qëllim mallrat e ndaluara dhe ato kontrabandë.

“Sot në orët e para të mëngjesit kemi ndërmarrë kontrolle të organizuara në rajonin e Gjakovës, respektivisht në pikë-kalimin kufitar të Qafës së Morinës ku rreth orës 07:30 minuta Njësitet anti-kontrabandë gjatë kontrollit ne një furgonin e tipit VË, me targa të Kosovës kanë gjetur një sasi të municionit”, thuhet në njoftim.

Më tej bëhet e ditur se pas përfundimit të kontrollit janë gjetur 540 fishek të kalibrit 7.62, ndërsa municioni ishte i fshehur në pjesën e pasme të furgonit.

Pas procedimit të rastit nga Dogana rasti është referuar në Policinë e Kosovës për masat e mëtejme.

“Në rastin tjetër Njësitet anti-kontrabandë në orët e para të mëngjesit të sotëm, saktësisht 02:15 në regjionin e Mitrovicës kanë ndaluar një furgon në të cilin u zbulua 1040 litra naftë të kontrabanduar”, bëhet e ditur.

Kundër vozitësit, shtetas kosovar ka filluar procedura kundërvajtjes doganore konform Kodit Doganore dhe të Akcizave, ndërsa mallrat e kontrabanduara (nafta) menjëherë i është nënshtruar konfiskimit si dhe përkohësisht është bërë ndalimi i automjetit.