Rasti i fundit për Kamerunin e Danimarkën

Pretoria, 19 qershor - Kameruni u mposht 1:0 nga Japonia, ndërsa Danimarka humbi 2:0 nga Holanda në ndeshjet e para të Botërorit dhe të dy përfaqësueseve u duhet fitorja për të mbajtur gjallë shpresat për kualifikim në raundin e dytë.
Atmosfera në kampin e Kamerunit nuk është shumë e mirë. Trajneri Paul le Guen ka refuzuar të flasë për media, ndërsa lojtarët me përvojë kanë kontestuar ekipin e selektuar nga ai. Disa nga reprezentuesit e Kamerunit janë të pakënaqur me promovimin e disa futbollistëve të rinj në njëmbëdhjetëshen startuese, në llogari të mbrojtësve veteranë, Rigobert Song, Geremi dhe Alexandre Song.
"Lojtarët e rinj nuk mund të përballojnë presionin që vjen me paraqitje në një turne të madh si kampionati botëror. Për këtë arsye ne i kemi bërë apel trajnerit që të rishikojë ekipin bazë për ndeshjen e së shtunës", ka thënë të enjten mesfushori Achille Emana.
Danimarka nuk ka humbur asnjëherë nga një përfaqësuese afrikane në kampionat botëror, por trajneri Morten Olsen është duke u brengosur për forcën e sulmit. Danezët nuk kanë shënuar në tri ndeshjet e fundit, ndërsa nuk e dinë nëse mund të llogarisin në sulmuesit Jon Dahl Tromasson e Mikkel Beckmann që është dashur të stërvitin vetëm. Olsen shpreson se sulmuesi i Arsenalit Nicklas Bendtner, që luajti vetëm rreth një orë kundër Holandës, për shkak të problemeve me ije, do të jetë plotësisht i gatshëm.

Kameruni është dukur i paforcë në sulm në përballje me Japoninë. Trajneri Le Guen pritet të vendosë më në qendër të sulmit sulmuesin Samuel Eto'o.

Këto dy përfaqësuese janë takuar dy herë në mes vete. Të dy takimet ishin miqësore. Kameruni fitoi 2:1 në vitin 1998, ndërsa me rezultat të njëjtë Danimarka fitoi në maj të vitit 2002.

Kameruni nuk ka fituar në tetë ndeshjet e fundit. Fitorja e fundit ishte ajo 2:1 kundër Zambias në janar, në Kupën e Afrikës.
Kameruni pesë herë është paraqitur në kampionate botërore, ndërsa grupin e ka kaluar vetëm një herë.

Vetëm dy nga 14 ndeshjet e kaluara të Danimarkës në botëror kanë përfunduar me rezultat të barabartë dhe të dyja ishin kundër vendeve afrikane. Në vitin 1998 barazoi 1:1 me Afrikën e Jugut, ndërsa me rezultat të njëjtë përfundoi edhe përballja me Senegalin katër vjet më vonë. Danimarka ka humbur tri takimet e fundit dhe nuk ka shënuar në asnjërin prej atyre takimeve.