Bajrush Xhemajli përballet me gjyqin

Kryetari i Komunës së Ferizajt, Bajrush Xhemajli do të ulet të hënën në bankën e të akuzuarve, nën akuzën se në maj të vitit të kaluar ka shkaktuar aksident komunikacioni, me pasojë vdekjen e një të riu dhe lëndimin e disa të tjerëve.
Xhemajli akuzohet nga prokurori publik, Gëzim Lluluni se ka shkaktuar një aksident të rëndë komunikacioni mëngjesin e 21 majit të vitit të kaluar në hyrje të Prishtinës.

Në këtë aksident kishte humbur jetën 21 vjeçari Labinot Rrustemi nga fshati Banullë e Lypjanit.

I lënduar kishte mbetur edhe kryetari i Komunës së Ferizajt, Bajrush Xhemajli i cili ishte dërguar në Austri për shërim.

Xhemajli akuzohet për vepër penale kundër sigurisë së trafikut publik në bazë të nenit 297.

Në seancën e parë pritet të marrin pjesë edhe palët e dëmtuara, ndërkaq kryetari i Trupit gjykues do të jetë gjyqtari Hamdi Ibrahimi. Ende nuk dihet nëse Xhemajli do të flasë apo do të mbrohet në heshtje, siç ka bërë në seancën e konfirmimit të aktakuzës në mars të këtij viti. /Koha/