Identifikohen rreziqet me të cilat përballet Mitrovica

Në dokumentin për rreziqet me të cilat përballet Komuna e Mitrovicës thuhet se kjo pjesë më së shumti rrezikohet nga vërshimet, zjarret si dhe materialet e rrezikshme, që kanë mbetur nëpër deponi të ndryshme në territorin e komunës nga ish-ndërmarrjet e Trepçës.

Në dokumentin e hartuar nga kjo komunë, përkatësisht nga Drejtoria për Mbrojtje dhe Shpëtim u tha se janë përfshirë të gjitha rreziqet natyrore, mandej ato teknologjike, epidemiologjike, infrastrukturës kritike etj”.

Drejtori për Mbrojtje dhe Shpëtim, Behxhet Bala theksoi se në përgjithësi ndër rreziqet kryesore që janë identifikuar për Mitrovicën janë vërshimet, zjarret si dhe materialet e rrezikshme, që kanë mbetur nëpër deponi të ndryshme në territorin e komunës nga ish-ndërmarrjet e Trepçës. “Nga përvoja e viteve të kaluara, mandej duke u bazuar në pozitën gjeografike etj, është konkluduar se vërshimet, zjarret dhe materialet e rrezikshme mbeten rreziqe të përhershme për Mitrovicën”, tha ai.

Ai sqaroi se në këtë dokument janë futur edhe rreziqet që janë identifikuar në veri të Mitrovicës. “Duke qenë se në veri ende nuk kemi një komunë legale, ne e kemi përfshirë gjithë territorin e Mitrovicës në këtë dokument”.

Drejtori Bala, tha se dokumenti për “Vlerësimin e rreziqeve nga fatkeqësitë natyrore dhe fatkeqësitë tjera”, ndihmon për ndërmarrjen e masave parandaluese ndaj këtyre rreziqeve të identifikuara.

“Tash do të nisim punën për hartimin e Planit për reagim, që është rrjedhojë logjike pas hartimit të dokumentit për vlerësimin e rreziqeve, me çka do të krijohet një bazë e mirë që ka të bëj me sferën e mbrojtjes dhe shpëtimit për qytetarët e Mitrovicës”, tha Bala. /Telegrafi/