DV: Partesh, në balotazh Cvetkovic dhe Mirkovic

Koalicioni i OJQ-ve vendore “Demokracia në Veprim” ka nxjerrë rezultatet paraprake të zgjedhje lokale në komunën e Parteshit, sipas të cilave do të ketë balotazh, ndërmjet Nenad Cvetkovic dhe Teodor Mirkovic.
Sipas rezultateve të këtij koalicioni, Cvetkovic ka fituar 47.4% të votave, Mirkovic 25.5%, ndërsa dy kandidatët tjerë, Vesna Jovanovic dhe Goran Milosevic, kanë fituar 23 %, respektivisht 4.2%.

Ndërsa sipas rezultateve paraprake për Kuvendin Komunal, numrin më të madh të votave (40 %) i ka fituar Zavicaj, i ndjekur nga JSL me 20 %. /Telegrafi/


Partesh, pjesëmarrje e kënaqshme në zgjedhje

Edhe pse Beogradi u ka bërë thirrje serbëve të mos marrin pjesë në zgjedhjet lokale, serbët e Parteshit kanë dëgjuar institucionet e Kosovës duke marrë pjesë në numër të konsiderueshëm në zgjedhjet lokale në këtë komunë, për kryetar dhe këshilltarë.

Komisionit Qendror Zgjedhor ka bërë të ditur se i gjithë procesi zgjedhor ka qenë i qetë dhe pa incidente.

Sipas të dhënave të KQZ-së, deri në mbylljen e vendvotimeve, kanë votuar 65.34 % e qytetarëve me të drejtë vote në këtë komunë. /Telegrafi/


Partesh, përfundon votimi

Janë mbyllur dyert e qendrave të votimeve në Partesh, komunë e cila është e banuar me serbë, ku të dielën është votuar për kryetar komune dhe këshilltarë komunalë.

Sipas informacioneve të KQZ-së, deri në orën 16, votën e tyre për strukturën komunale e kanë hedhur 1.606 votues, përkatësisht 45,78% e numrit të njerëzve me të drejtë vote.

Në konferencat e radhës, KQZ-ja pritet të dalë me numrin përfundimtar të pjesëmarrjes në votime në Partesh, ndërsa rezultatet preliminare do të jepen dikur para mesnate.

Parteshi është komunë e re më shumicë serbe, e formuar në bazë të procesit të decentralizimit. Zgjedhjet për pushtetin lokal në Partesh qenë shtyrë nga nëntori i vitit të kaluar për qershor te këtij viti, pasi, siç thuhej, nuk ishin përmbushur të gjitha kriteret për mbajtjen e tyre atëherë.