Zyra e Regjistrimit Civil edhe në Partesh

Ministri i Punëve të Brendshme, Bajram Rexhepi, bëri të martën përurimin e Qendrës Komunale të Regjistrimit Civil në komunën e re të Parteshit, të banuar me shumicë serbe. Ai tha se kjo Qendër i plotëson të gjitha kushtet për pajisje me dokumentet civile dhe me këtë rast potencoi rëndësinë e pajisjes me këto dokumente të të gjithë qytetarëve të Parteshit.

Ministri Rexhepi gjithashtu premtoi se shërbimet e Ministrisë së Punëve të Brendshme do të jenë të shpejta dhe cilësore për të gjithë qytetarët e këtij vendi. “Sot kishim kënaqësinë të bëjmë inaugurimin e Qendrës Komunale të Regjistrimit Civil në Partesh. Në këtë Qendër kushtet për personel janë shumë të mira dhe shpresoj se edhe qytetarët do të jenë shumë të kënaqur me shërbimet që do t’i bëjë personeli i Ministrisë së Punëve të Brendshme”, tha ministri Rexhepi.

Ndërsa kryetari i Kuvendit Komunal të Parteshit, Nenad Cvetkovic, tha se hapja e kësaj qendre në këtë komunë është një hap pozitiv në çështjen e integrimit të komuniteti serb si dhe “lehtëson shumë procedurën e pajisjes me dokumente civile, sepse deri më tani banorët e Parteshit është dashur të shkojnë në komunën e Gjilanit për tu pajisur me dokumentet e tyre”. /Telegrafi/