Dy fytyrat e Feithit

Zyrtarët politik në Prishtinë e vlerësojnë në mënyra të ndryshme fjalimin e përfaqësuesit të BE-së Pieter Feith para Komitetit për Politikë të Jashtme të Parlamentit Evropian.
Thirrjet e tij drejtuar zyrtarëve të nivelit të lartë të cilët janë nën hetime apo janë të akuzuar për korrupsion, që të tërhiqen nga politika qoftë edhe përkohësisht në mënyrë që hetimet të përfundojnë para procesit të ardhshëm zgjedhor, për Qeverinë janë qëndrime personale të përfaqësuesit të BE-së.

Zëdhënësi i Qeverisë së Kosovës, Memli Krasniqi thotë se fjalimi i Feithit në shumë aspekte ka qenë i balancuar, kurse çështjet e sundimit të ligjit, nënvizon ai, nuk ndërlidhen me data e as me zgjedhje, sepse ato janë angazhime të përhershme.

Siç raporton e përditshmja Zëri, diç më ndryshe nga Qeveria vlerësohet raportimi i Pieter Feithit nga ana e opozitës dhe analistëve të çështjeve evropiane.

Sekretari i përgjithshëm i Aleancës për Ardhmërinë e Kosovës, Burim Ramadani thotë se Feith ka prezantuar gjendjen reale në Kosovë.

Ai e mbështet procedimin e rasteve nën hetime, sidomos rasteve të cilësuara si “peshqve të mëdhenj” para zgjedhjeve të ardhshme, të parapara për vjeshtën e vitit 2011.

Ndërkohë, analisti i çështjeve evropiane Shenoll Muharremi e vlerëson fjalimin dhe qëndrimin e përfaqësuesit të BE-së Pieter Feith në interes të Kosovës. /Zëri/Telegrafi/