Lubjana përshëndet heronjtë e vet të Botërorit

Lubjanë, 26 qershor – Trimat sllovenë të futbollit janë kthyer në atdhe. Pas pritjes së shkurtër e të përzemërt në aeroportin Bërnik, ku në mesin e tifozëve që kishin dalë t’i presin dhe përshëndesin gjendej edhe kryeministri slloven, Borut Pahor, ata arritën në Lubjanë, ku u pritën nga mbi 10 000 adhurues të disponuar, bashkë me kryetarin e Lubjanës, kurse pas kësaj ngjarje ata do të priten edhe nga presidenti i vendit Danillo Türk, njofton edicioni online i të përditshmes qendrore sllovene “Dello”.

Në anën tjetër, në aeroportin e Beogradit, futbollistët e Serbisë u pritën vetëm nga dhjetëra simpatizantë të tyre. Të trimëruar pa pasur arsye të mjaftueshme, futbollistët, por edhe simpatizantët e kombëtares serbe janë zhgënjyer me eliminimin nga Botërori 2010, andaj as nuk kanë dalë në pritje.