Ashton përshëndet heqjen e embargos ndaj Serbisë

Përfaqësuesja për politikë të Jashtme dhe Siguri e Bashkimit Evropian, baronesha Catherine Ashton, ka përshëndetur heqjen e embargos që Kosova i kishte vendosur Serbisë muaj më parë për shkak se kjo e fundit nuk pranonte qarkullimin as transit të mallrave të prodhuara në Kosovë.

Ashton ka thënë se KFOR-i dhe EULEX-i kanë filluar të premten të ndihmojnë në implementimin e marrëveshjes për doganat të arritur nga Prishtina dhe Beogradi, dhe ka shprehur kënaqësinë që menjëherë ka filluar edhe qarkullimi i mallrave nga Serbia për në Kosovë.

Njëkohësisht, baronesha Ashton ka thënë se shpreson që së shpejti edhe mallrat e prodhuara në Kosovë do të qarkullojnë drejt Serbisë, raportojnë mediat serb. Ajo me këtë rast u ka bërë thirrje qytetarëve serbë në veri të Kosovës që të përmbahen dhe të ruajnë paqen. /Telegrafi/