EULEX-i po heton 69 raste të korrupsionit

EULEX-i po heton 69 raste të korrupsionit






Dosjet që kanë të bëjnë me dyshimet për korrupsion dhe
krime financiare, me të cilat është duke u marrë Misioni Evropian për
Sundimin Ligjit-EULEX, janë goxha të shumta. Zyrtarë të këtij misioni
kanë konfirmuar për Express se aktualisht Prokuroria Speciale e EULEX-it
është duke hetuar saktësisht 69 dosje.“Prokuroria Speciale e
Republikës së Kosovës tash për tash është duke u marrë me 69 raste, të
cilat kanë të bëjnë me krime financiare”, thotë Kristiina Herodes,
zëdhënëse e EULEX-it, për Express.
“...Ky numër i çështjeve përfshinë gjithashtu edhe rastet e
korrupsionit”, shpjegon Herodes e cila megjithatë nuk saktëson shumë
gjëra.
Ajo nuk është në gjendje të qartësojë se të cilave nivele këto raste u
përkasin si dhe cilën periudhë kohore ato përfshijnë. “Kjo është krejt
çfarë mund të them në lidhje me këtë çështje”, thotë Herodes.
Por, duket se për të bërë këto hetime, EULEX-i nuk është i vetëm. Një
pjesë të mirë të punës për ta e ka kryer dhe vazhdon ta bëjë edhe
Agjencia Kundër Korrupsionit.