Dëmtimet e mushkërive fillojnë në mitër

Terapia me gjene mund të ndihmojë në parandalimin e disa sëmundjeve që të zhvillohen tek fëmijët e pa lindur, bëjnë të ditur hulumtimet më të reja.
Një ekip i hulumtuesve anglezë ka sugjeruar se trajtimi me gjene për fibrozë cistike mund të dërgohet te fetusi në mitër. Dr. Simon Waddington nga College University në Londër, ka thënë se ekipi i tij i studimit ka përdorur ultrazërin për të demonstruar mundësinë e trajtimit të mushkërive të miut, i cili ende nuk kishte lindur.
“Me diçka si fibroza cistike, ka prova se dëmtimet e mushkërive fillojnë në mitër”, thotë Waddington. “Nëse mund ta trajtojmë problemin para se të fillojë, këtu edhe do të kemi më shumë dobi”.
Hapi i ardhshëm do të jetë që eksperimenti të kryhet në majmunë, thonë shkencëtarët dhe kjo, mund të çojë në një terapi njerëzore në të ardhmen. Terapia me gjene mjekon sëmundjet, veçanërisht ato trashëguese, duke kyçur gjen të ri në qelizat dhe indet e personit.