Kina krijon super-kompjuterin më të shpejtë në botë

Kina ka arritur të krijojë super-kompjuterin më të shpejtë ndonjëherë, ka njoftuar agjencia e lajmeve AFP të enjten.
Tianhe-1, që do të thotë “Rruga e Qumështit”, ka shpejtësinë e 2.507 bilionë përllogaritjeve në sekondë, që e bën atë kompjuterin më të shpejtë në Kinë, por po ashtu më të shpejtë për 1.4 për qind se super-kompjuteri më i shpejtë në botë deri më tani, i cili është i vendosur në laboratorin kombëtar në Tennessee të Shteteve të Bashkuara të Amerikës.


Tianhe-1 është zhvilluar në Qendrën kombëtare për super-kompjuterë në qytetin bregdetar kinez Tianjin, duke shfrytëzuar çipat të cilët kryesisht i kanë dizajnuar kompanitë amerikane. Institucionet e caktuara kineze siç është Instituti meteorologjik kinez në Tianjin tanimë kanë filluar të bëjnë testime duke shfrytëzuar kompjuterin.



“Ai po ashtu do të mund të shërbejë industrisë së animacionit dhe hulumtimeve bio-mjekësore”, ka thënë drejtori i Qendrës, Liu Guangming.

Profesori Jack Dongarra, nga universiteti i Tennessee, ka theksuar se kjo “bishë” kineze është makina dukshëm më e fuqishme kompjuterike në botë.