Me “Ecja 2010” përmbyllet muaji i luftës kundër kancerit të gjirit

Prishtinë, 30 tetor - Me moton “Zbulimi i hershëm = mbijetesë”, të shtunën në Prishtinë, u organizua marshi tradicional kundër kancerit të gjirit “Ecja 2010”, aktivitet ky i organizuar vitin e tretë radhazi në Kosovë, që shënon përmbylljen e muajit të luftës kundër kancerit të gjirit.
Ky manifestim tradicional kundër kancerit të gjirit, siç raporton KosovaLive, sivjet është organizuar nga Qendra kosovare e kancerit të gjirit “Jeta-Vita” e përkrahur nga Ministria e Shëndetësisë, Komuna e Prishtinës, Qendra Klinike Universitare e Kosovës dhe një rrjet i organizatave qeveritare dhe joqeveritare.
Ecjes i kanë paraprirë disa performanca artistike, përmes të cilave është përçuar mesazhi i rëndësisë së luftës kundër kancerit të gjirit dhe në përgjithësi kundër sëmundjes së kancerit.
Ndërkaq, Ilir Tolaj, sekretar i përgjithshëm në Ministrinë e Shëndetësisë, Nazane Breca, drejtoreshë e Departamentit të Komunës së Prishtinës për Shëndetësi e Mirëqenie Sociale dhe Nafije Latifi, drejtoreshë e qendrës “Jeta -Vita”, kanë bërë thirrje për aktivitete në vazhdimësi në fushën e sensibilizimit dhe parandalimit të kancerit, por edhe për diagnostikimin, trajtimin dhe luftimin e saj me sukses.
Nëpër një mot të mirë dhe me një pjesëmarrje të konsiderueshme të qytetarëve, pjesa më e madhe nga gjinia femërore, pjesëmarrësit kanë bërë një marshim simbolik nga Teatri Kombëtar deri te Hoteli Grand, ndërkohë që për rekuizitat dhe elementet përcjellëse të këtij aktiviteti, është përkujdesur kompania “Roche” nga Prishtina, “AIHA” dhe kontribues të tjerë.