EULEX mban ekskluzivitetin për rastet e luftës

Drejtori i Institutit të Mjekësisë Ligjore, Arsim Gërxhaliu ka
thënë se Komisioni qeveritar për personat e pagjetur është ndërruar
varësisht prej ndërrimit të qeverive, politikave dhe grupimeve politike.
Dhe kjo, sipas tij, është një gabim i madh.Në një
intervistë për Radion Evropa e Lirë, Gërxhaliu ka thënë se analizat e
ADN-së janë ripërsëritur disa herë, që do të thotë janë dërguar dhjetëra
herë analizat, mostrat e pjesëve kockore në Komitetin Ndërkombëtar për
Persona të Pagjetur dhe se tashmë janë kthyer shumica e analizave dhe
pritet që edhe pjesët tjera të rikthehen.
“Nga ato 400 mbetje mortore që kemi pasur më herët, tani ka dalë se
pas arritjes së analizave janë ribashkuar shumica e pjesëve, sepse kanë
qenë pjesë të të njëjtit trup, por të ndara. Kështu që numri i
individëve ka rënë në 250 përafërsisht”, ka thënë ai.
Sipas tij, më e vështira e kësaj çështjeje është se kjo pjesë e
mbetur nuk konsiston me donorët e gjakut familjar që e kanë dhënë gjakun
për t’u bërë konsistimi.
“Ne i rikthehemi në mënyrë retrograde pjesës së kaluar para 12
vjetësh, kur 2-3 vjetët e para kemi rreth 2019 familje, të cilat i kanë
varrosur të afërmit e tyre pa kurrfarë analize të ADN-së. Njëkohësisht,
në këtë grupim tani mund të shtohen edhe disa gjëra tjera që nga
eksperienca dalin se nuk kanë qenë korrekte duke filluar nga fshati
Studime në Vushtrri, ku është një varrezë masive, me rreth 107 persona
që janë vrarë brenda një ore, dhe se pas luftës menjëherë janë varrosur
nga lokalët dhe pastaj janë hapur nga ekipet e Tribunalit të Hagës”, ka
thënë Gërxhaliu.
I pyetur se pse një nga pengesat në mosidentifikimin e mbetjeve
mortore është edhe EULEX-i, Gërxhaliu ka thënë se në Ligjin për
themelimin e Departamentit të Mjekësisë Ligjore, nuk ceket për ndonjë
ekzekutiv të EULEX-it, kurse në raportet e tyre dhe më pas me
ish-shkresat tjera, EULEX-i mban ekskluzivitetin e këtyre rasteve.
“Në atë kohë reagimi im ka qenë lidhur me këto çështje. Por, ndërkohë
ka ardhur deri te përmirësimi i raportimeve, sepse raportimet kanë qenë
më të mangëta dhe tani kemi raportime dhe paraqitje të varrezave dhe
planifikimi i tyre në terren. Normalisht që në disa raste, të cilat janë
më të ndjeshme, ne fare nuk kemi qasje, pra thjesht EULEX-i mban
ekskluzivitetin për rastet e luftës”, ka thënë ai. /Telegrafi/