Qeveria e mban të fshehtë platformën e bisedimeve

Autoritetet qeveritare nuk kanë dhënë sinjale se do ta vënë në
dijeni Presidencën dhe Qeverinë për përmbajtjen e platformës së dialogut
Kosovë-Serbi. Pas mbledhjes së Qeverisë,
zëvendëskryeministri Hajredin Kuçi nuk ka treguar as adresën se ku
ndodhet platforma dhe as nëse ka gatishmëri për ta dorëzuar atë te shefi
i shtetit apo te deputetët, shkruan Koha Ditore.
Për detaje ka thënë të pyetet kolegia e tij, e ngarkuar për bisedime, Edita Tahiri.
Pasi ka konfirmuar se “ka platformë për bisedime” dhe atë e kanë
“organet kompetente të Kosovës”, Kuçi ka thënë se duhet të pyetet Tahiri
se kur ajo do të dërgohet në Presidencë e Kuvend.
Gazeta ka provuar ta kontaktojë në telefon zëvendëskryeministren që
drejton ekipin kosovar të përfshirë në dialog me Serbinë, por ajo nuk u
është përgjigjur telefonave.
Megjithatë, Kuçi ka deklaruar se ekzekutivi po jep llogari para deputetëve për rrjedhën e dialogut.
“Ne jemi të gatshëm t’i përgjigjemi Kuvendit për gjithë punën dhe
aktivitetin dhe jo vetëm për dialog, por për çdo veprim institucional që
bëjmë”, tha ai, pasi është pyetur për kritikën e shprehur nga
kryeparlamentari Jakup Krasniqi, rreth mungesës së informatave për
procesin e dialogut.
“Është e vërtetë e madhe se ne kemi vërejtje e madhe se ne kemi
vërejtje sa u përket zhvillimeve të këtyre bisedimeve për mungesën e
informacioneve”, ka thënë Krasniqi. /Telegrafi/