Jeremic: Jam pjesë bisedimeve

Ministri i Jashtëm i Serbisë, Vuk Jeremic, ka deklaruar se nuk i janë marrë kompetencat që të merret me Kosovën dhe rajonin, duke përgënjeshtruar kështu mediat serbe që thoshin se ai është duke punuar vetëm me shtetet e painkuadruara për shkak se me rajonin merret presidenti Boris Tadic, me Kosovën drejtori politik Borko Stefanovic, ndërsa me integrimet evropiane Bozidar Djelic.
“Kur është fjala për dialogun me Prishtinën, Ministria e Punëve të Jashtme, si dhe të gjitha institucionet tjera shtetërore, ofron mbështetjen e domosdoshme juridike dhe diplomatike për ekipin negociator të Qeverisë së Serbisë, e sipas nevojës edhe takohemi”, ka thënë Jeremic, ndërsa raporton Express.

Ai ka deklaruar se përmes bisedimeve do të përmirësohet jeta e serbëve në Kosovë, duke pohuar se procesi sapo ka filluar dhe se shpreson që së shpejti të pasojnë edhe rezultatet e para.

Shefi i diplomacisë serbe ka bërë të ditur se javën e ardhshme do të takohet në Beograd me ministrin e Jashtëm kinez si dhe me shefin e diplomacisë së Azerbajxhanit, me të cilët do të diskutojë edhe për Kosovën. Ai po ashtu ka thënë se do të përfaqësojë Serbinë në seancën për Kosovën në Këshillin e Sigurimit të Kombeve të Bashkuara. /Telegrafi/