Jeremic: S’ka vend për Kosovën në iniciativat rajonale

Ministri i Jashtëm i Serbisë, Vuk Jeremic, deklaroi sot se
Kosova po përpiqet të aplikojë për t’u bërë anëtare e ndonjërës nga tri
iniciativat rajonale, të cilat i kryeson Serbia.“Për Kosovën
në këto organizata nuk ka vend, meqë në to janë vetëm shtetet sovrane
të pavarura”, është shprehur Jeremic para gazetarëve, pasi iu drejtua
koordinatorëve të Iniciativës të Adriatikut-Jonit në mbledhjen që po
mbahet në Beograd.
Kur bëhet fjalë për mbledhje rajonale, Jeremic ka theksuar se Serbia
nuk dëshiron që përfaqësuesit e Prishtinës të përjashtohen nga
pjesëmarrja, por nuk mund të bëhet fjalë për anëtarësimin e tyre e as
për format pjesëmarrjeje jashtë suazave të UNMIK-ut dhe të Rezolutës
1244.
“Nuk mund të flasim as për anëtarësim, as për format pjesëmarrjeje që
do të ishte jashtë suazave të UNMIK-ut dhe të Rezolutës 1244, e cila
goxha qartë përkufizon mënyrën me të cilën eventualisht do t’u lejohej
përfaqësuesve të Prishtinës të marrin pjesë në ato mbledhje”, citon
FoNet Jeremicin.
Ai si shembull ka përmendur mbledhjen në Luksemburg, që u mbajt të
hënën, ku ministrat e Jashtëm të Evropës u takuan me ministrat e Jashtëm
të shteteve të Ballkanit Perëndimor. Përfaqësuesit e Prishtinës aty
merrnin pjesë, por në kuadër të parametrave të përkufizuar qartë, të
shoqëruar nga UNMIK-u. /Telegrafi/