Jeremic: Kosova po i paguan zyrtarët e Afrikës!

Ministri i jashtëm i Serbisë, Vuk Jeremic, ka thënë prapë se Guinea-Bissau nuk e ka pranuar Kosovën.

Ai ka thënë se “në shumë vende, sidomos në Afrikë, funksionarëve të atjeshëm u janë ofruar para për ta ndryshuar qasjen e tyre për Kosovën”.

“Kjo tash është vërtetuar në disa raste”, ka thënë Jeremic, transmeton Vesti-online.

Sipas tij, “në një shtet po kryhen hetimet kundër një zyrtari të lart për dyshimet se ka marrë para për ta pranuar Kosovën”.

Zëvendëskryeministri Pacolli, i cili ndodhet në një turne lobues në Afrikë, ka pasur të enjten një bisedë telefonike me presidentin e Republikës së Guinea-Bissau, Malam Bacai Sanha, i cili i ka rikonfirmuar atij se institucionet e këtij shteti e kanë proceduar deri në fund procesin e njohjes së Pavarësisë së Kosovës.

“Deklaratat e tilla të Pacolli tregojnë se ai po nervozohet se veprimtare e tij kriminale ka nisë të zbulohet”, ka thënë Jeremic. Ai madje shton se “kjo ishte një nga shkaqet se pse përfaqësuesi amerikan në Kosovë e kanë larguar Pacollin nga i ashtuquajturi post i presidentit të Kosovës”. /Telegrafi/