Pacolli ia mësyn Afrikës për njohje të reja

Zëvendëskryeministri i ngarkuar për të sjellje të njohjeve dhe të investimeve, Behgjet Pacolli ka treguar se fundi i javës së ardhshme do të shënojë edhe fillimin e një misioni lobues të tij për njohjen e Kosovës në kontinentin e Afrikës.

“Unë para dy ditëve e kam marr postin e zëvendëskryeministrit dhe misionin e lobimit do ta filloj. Nga fundi i javës së ardhshme unë do t’ia mësyj rrugës sime, do të jem në Afrikë dhe do t’i vizitoj disa shtete në veriperëndim të këtij kontinenti”, ka thënë Pacolli.

Zëvendëskryministri nuk ka dashur të zbulojë vendet që do t’i vizitojë, ngase, sipas tij, Serbia është duke zhvilluar një aktivitet të kundërtën me atë të Kosovës, por këto shtete të Afrikës janë vende tek të cilat ai është i përqendruar dhe do të jetë atje.

Pacolli ka dashur të besojë se me t’u kthyer në Prishtinë nga ky aksion mundi ka për t’u shpërblyer.

“Unë duhet të udhëtoj, duhet të shkoj në vend dhe mbas kthimit tim do të jetë çdo gjë e qartë. Unë besoj se procesi i njohjeve të Kosovës do të fillojë”, ka thënë Pacolli për Kohën Ditore. /Telegrafi/