Paralajmërohen njohje të reja

Zyra e zëvendëskryeministrit Behgjet Pacolli përmes një njoftimi për media ka theksuar se shumë shpejt priten edhe dy njohje nga Amerika Qendrore-Caricom.
“Krahas aktiviteteve të ngjeshura lobuese në kontinentin e Afrikës, zëvendëskryeministri i parë i Qeverisë së Republikës së Kosovës, Behgjet Pacolli, i mbështetur nga zyra e tij dhe lobuesit profesional, po drejton një kampanjë të fuqishme me vendet e Oqeanisë dhe shtetet e Caricomit”, thuhet në njoftim.

Më tej në komunikatë thuhet “Mund të ju konfirmojmë se kemi sinjale të fuqishme se shumë shpejt do të kemi njohje nga dy vende nga Amerika Qendrore-Caricom. Për hir të respektimit të strategjisë, me emrat e këtyre dy shteteve do të ju njoftojmë me kohë”.

Ndryshe, mbrëmë Republika e Beninit ka njohur shtetin e Kosovës. Kjo është njohja e 80 për vendin. /Telegrafi/