PDK mban postet e kryeministrit dhe presidentit?

Disa anëtarë të Kryesisë të PDK-së i kanë kërkuar liderit të Hashim Thaçit që, përveç postit të kryeministrit, kjo parti ta ketë edhe postin e presidentit, bënë të ditur për NEWS TV një zyrtar i lartë i kësaj partie.

Merret vesh se në një takim ndërmjet tij me disa anëtarë të Kryesisë, është diskutuar kjo çështje, por kjo do të sqarohet në ditët e ardhshme.

“Në takim nuk është biseduar për resorët tjerë të kabinetit qeverisës, pasi që sipas një zyrtari të lartë të PDK-së, kjo do të bëhet pas bisedimeve me partitë tjera politike”, ka theksuar ky zyrtar.

Sipas të njëjtit burim, tashmë edhe brenda PDK-së ka nisur debati për të unifikuar qëndrimin e saj për negociatat që e presin javën e ardhshme për krijimin e qeverisë së re.

Zyrtari i lartë kësaj partie i ka thënë NEWS TV, se lideri Hashim Thaçi po konsultohet me anëtarët tjerë të Kryesisë për ofertat që do t’ia dërgojë partive që dëshiron t’i ketë në koalicionin e ardhshëm qeverisës.

Lideri i PDK-së, duket se nuk do ta ketë të lehtë në negociatat me partitë tjera, të cilat synojnë postin e presidentit, por edhe të kryeministrit. Ai vetë ka deklaruar se do të jetë kryeministër dhe se partia e tij nuk synon të ketë të tri postet e larta shtetërore.

Por, siç merret vesh, Thaçi e ka të vështirë të frenojë ambiciet e një pjese të PDK-së që, ky subjekt të mbajë edhe postin e presidentit. Burimi brenda PDK-së, ka thënë se nëse nuk arrihet të sigurohet edhe posti i presidentit tensionet brenda këtij subjekti politik do të rriten.

Megjithatë anëtari i Kryesisë, Memli Krasniqi ka thënë për Evropën e Lirë se për PDK-në, vetëm një gjë është e qartë - kryeministër do të mbetet Hashim Thaçi, ndërsa postet tjera, sipas tij, mbeten të negociueshme