Organizoi dasmë me buldozer

Se recesioni ka ndikuar edhe në ditën më të lumtur të qiftit të sapomartuar, dëshmuan edhe Zhang Zongquiang dhe Ye Yuzi me dasmën e tyre të pazakontë, ku me qëllim që t’i ulin shpenzimet, kanë angazhuar buldozerë për ta marrë nusen.
Dhëndëri Zhang Zongquiang, punon në një firmë ku prodhohen makina pune. Ai e shfrytëzoi këtë mundësi dhe angazhoi gjashtë buldozerë për ta marrë nusen. Në këtë mënyrë dhëndëri kurseu goxha para.

Edhe pse e dashura e tij fillimisht ishte kundër kësaj ideje, në fund pranoi dhe u befasua vërtetë. Buldozerët me balona dhe fjongo me lara u bënë atraksion nëpër rrugët e qytetit Pingdingshan.

Martesa e tyre mori një bukuri të veçantë dhe ishte krejt ndryshe prej dasmave tjera, e kjo i pëlqeu shumë nuses. Kolonën e pazakontë të dasmës e përcillte edhe policia.