Mourinho: Do ta mposhtim Milanin

Jose Mourinho thotë se Real Madridi mund të festojë në San Siro dhe pret një ndeshje të shkëlqyeshme ndaj Milanit, ndeshje e cila, sipas tij, do të përcillet nga e gjithë Evropa.
Mbretërit udhëtojnë te Milani me një traditë të keqe por portugezi është i bindur se ekipi i tij mund të festojë në San Siro.

“Është e nevojshme të fokusohemi vetëm te vetja dhe të jemi të gatshëm. Ekipi është i fuqishëm po aq sa ishte të shtunën ose ndoshta edhe më i fuqishëm. Ndeshja ndaj Milanit nuk është vendimtare, por është e rëndësishme. Ekipi është në formë të mirë dhe të gjithë jemi të gatshëm psikologjikisht për ndeshjen. Është mirë të jesh në San Siro dhe të luash kundër Milanit”, ka thënë Mourinho.

Reali kurrë nuk ka shënuar fitore ndaj Milanit në San Siro, por Mourinho beson se ekipi i tij është i aftë ta bëjë një gjë të tillë.

“Fakti se Real Madridi nuk ka fituar në San Siro nuk na jep presion shtesë. Ky është një vend i vështirë për të fituar. Reali ka pasur ekipe të shkëlqyeshme dhe nuk ka arritur të shënojë fitore. Por jam i sigurt se fansat e Milanit janë të shqetësuar pasi Real Madridi mund të fitojë. Mund të fitojmë”, ka shtuar më tej portugezi.