Ish-ministri Sadri Ferati merr timonin e LDK-së në Mitrovicë

Mitrovicë, 4 nëntor - Ish-ministri i Administrimit të Pushtetit Lokal, Sadri Ferati, është zgjedhur kryetar i Degës së Lidhjes Demokratike të Kosovës në Mitrovicë, në Kuvendin Zgjedhor të kësaj partie që i përfundoi punimet në orët e vona të mërkurën.

Kuvendi zhvilloi punimet e tij në pjesëmarrje të 99 delegatëve të nëndegëve të këtij subjekti, ndërsa i pranishëm ishte nënkryetari i LDK-së Eqrem Kryeziu.

Kryetari i ri i Degës së LDK-së në Mitrovicë, Sadri Ferati, mori 68 vota, ndërkohë që kundërkandidati i tij, Faton Peci, ka marrë 28 vota.

Sadri Ferati për kandidat për kryetar u propozua nga Paraprakisht kryetari i deritashëm, Mursel Ibrahimi. Ai propozimin e arsyetoi me faktin se Ferati është aktivist shumëvjeçar i LDK-së, ish drejtues i partisë dhe së fundi edhe ministër.

Delegati Selatin Imeri duke kritikuar punën e deritashme të LDK-së për një vetëmbyllje ka preferuar reformimin e saj dhe freskimin e radhëve të LDK-së me anëtarë që mund të ndikojnë në nxitjen e votuesve për të dalë në zgjedhje. Ai ka propozuar që Faton Peci të jetë kandidat për kryetar, propozim ky që është pranuar nga delegatët.

Nënkryetari i parë i LDK-së dhe përgjegjësi i monitorimit të kuvendeve zgjedhore, Eqrem Kryeziu, ka theksuar se është momenti që të zgjidhen personat që janë të aftë të udhëheqin vendin. Ai ka theksuar se është dashur shumë kohë të pritet që të dëshmohet vizioni dhe udhëheqja politike e Dr. Ibrahim Rugovës, gjë që më së miri u artikulua në mendimin e Gjykatës Ndërkombëtare të Drejtësisë rreth çështjes së Kosovës.

Radhëve të LDK-së në Mitrovicë i janë kthyer edhe dy aktivistë të mëparshëm, Shefik Mehmeti (deri tash nënkryetar i degës së LDD-së) dhe Hilmi Haxha (këshilltar komunal në mandatin e kaluar po nga LDD-ja.