Krasniqi kthehet në shkurt kundër amerikanit Banks?

Prishtinë, 4 nëntor - Luan Krasniqi pritet të kthehet në ring pas më shumë se dy vjetëve pauzë. Krasniqi 39-vjeçar që bokson në kategorinë e rëndë, po planifikon që në shkurt të vitit 2011 të ngjitet sërish në ring, ndërsa nga burimet afër boksierit junikas njoftohet se kundërshtar i mundshëm pritet të jetë amerikani Jonathon Banks.

"Unë kam ende forcë të madhe dhe energji. Dua edhe një herë të shoh nëse jam në gjendje të luftoj në nivelin më të lartë", ka thënë Krasniqi për gazetën gjermane "Bild".

Krasniqi luftën e tij të fundit e zhvilloi më 15 nëntor të vitit 2008, ku pësoi me nokaut në raundin e tretë nga ukrainasi Alexander Dimitrenko. Junikasi në boksin profesionist ka bilanc prej 30 fitoreve (14 KO), 4 humbjeve dhe një barazimi.

"Jemi duke punuar që Luani të boksojë sërish. Kjo mund të ndodhë shumë shpejt", ka thënë agjenti i Krasniqit, Christoph Schickhardt. Krasniqi pritet të boksojë në Ludwigsburg të Gjermanisë.

"Një meç në shtëpi do të ishte fenomenal", ka shtuar kosovari.

Kundërshtari i mundshëm i Krasniqit, Banks, 28-vjeçar, ka bilanc prej 25 fitoreve (17 KO), një humbjeje dhe një barazimi. Ai kishte luftuar në shkurt të vitit 2009 për titullin e botës të versionit IBF në kategorinë cruiser ku u mposht me nokaut teknik në raundin e tetë nga polaku Tomasz Adamek. Burime të gazetës njoftojnë se në rast të një triumfi ndaj Banksit, Krasniqit do t'i ofrohet rasti të boksojë për titull të botës në versionin WBC kundër ukrainasit Vitaly Klitschko.

Mediumet gjermane dyshojnë nëse Krasniqi është në gjendje të luftojë sërish. Junikasi ka pësuar dy humbje bindëse në dy meçet e fundit. Ai ishte mposhtur më 14 korrik të vitit 2007 me nokaut teknik në raundin e pestë nga amerikani Tony Thompson. Dueli ishte eliminator për titullin e botës në versionin WBO.

"Rikthim në ring me 39 vjet. Pse po ia bën këtë vetes, z. Krasniqi?", ka shkruar gazeta gjermane "Bild".