Vorio-epirotë të rinj, protestë kundër qeverisë shqiptare

Athinë, 4 nëntor - Rreth 200 vetë, që quhen anëtarë të rinisë Vorio-Epirote, protestuan në Athinë kundër qeverisë shqiptare.

Me parrullat e tyre ata kërkonin drejtësi për Aristotel Gumën, dënimin maksimal për autorët e ngjarjes së Himarës, më 12 gusht të këtij viti, mbrojtjen e pronave të vorio-epirotëve dhe mbrojtje për grekët e Shqipërisë.

Protestuesit akuzuan qeverinë shqiptare se diskriminon minoritarët. “Në Shqipëri anëtarët e minoritetit pushohen nga puna vetëm sepse janë grekë, kurse pronat e tyre janë në duart e grabitësve qeveritarë”, shkruante një nga pankartat që ata mbanin në duar.

Të rinjtë minoritarë i kërkuan qeverisë shqiptare të plotësojë kushtet për mbrojtjen e minoritetit grek që jeton në Shqipëri, njfton TCH.

Ata kërkuan lejimin e tabelave në gjuhën greke në rrugët e Shqipërisë, të drejtën e shënimit të kombësisë dhe fesë në dokumentet e identifikimit, të drejtën e shkollave greqisht në gjithë jugun e Shqipërisë.