Protestë kundër vendimit për ndaljen e shamisë

Si pasojë e nxjerrjes së Udhëzimit Administrativ të lëshuar nga MASHTI-i, si dhe projekt rregullores për arsim fillor dhe të mesëm të Komunës së Prishtinës, të cilët ndalojnë bartjen e mbulesës/shamisë në shkollat publike, më shumë se 20 organizata joqeveritare të premten organizojnë një protestë masive në Prishtinë.
“Vendimi për ndalimin e bartjes së shamisë nga ana e besimtareve myslimane është i jashtëligjshëm si me Konventën Universale të të Drejtave të Njeriut, ashtu edhe me Kushtetutën e Kosovës. Për më tepër një vendim i tillë, prish tolerancën ndërfetare të shqiptarëve që ekziston për shekuj me radhë”, thuhet në një kumtesë për media.

Me anë të kësaj proteste, mes tjerash kërkohet nga Institucionet e Kosovës largimi i ndalesës për bartjen e shamisë në shkollat e mesme dhe të larta, garantimin e lirisë së bartjes së mbulesës nga ana e pjesëtareve të besimit islam, si edhe garantimi i zbatimit të të gjitha obligimeve tjera fetare sipas Deklaratës Universale të të Drejtave të Njeriut, të cilësdo fe të pranuar institucionalisht që praktikohet në Kosovë.