Sejdiu dhe Mustafa kandidatë për kryetar të LDK-së

Prishtinë, 7 nëntor – Që në fillim të punës së Kuvendit Zgjedhor të Lidhjes Demokratike të Kosovës, që po mbahet sot në Prishtinë, u eliminua dilema e kahershme se kusht do të jetë kandidat për kreun e partisë. Sabri Hamiti, i cili kryesonte mbledhjen e Kuvendit paralajmëroi delegatët se kandidatë zyrtarë për kryetarë të LDK-së janë Fatmir Sejdiu dhe Isa Mustafa. Por, Hamiti nuk sqaroi se si do të votohet, me vota të hapura, apo me të fshehta.
Kuvendin e VII Zgjedhor të LDK-së e ka hapur kryetari aktual i LDK-së, Fatmir Sejdiu.
Sejdiu ka paraqitur ekipi udhëheqës të Kuvendit Zgjedhor, i cili përbëhet nga Sabri Hamiti, Lirie Kajtazi, Eqrem Kryeziu, Lutfi Haziri, Isa Mustafa, Gazmend Muhaxheri e Fatmir Sejdiu.
Në Kuvendin e VII Zgjedhor të LDK-së nuk po marrin pjesë Bujar Bukoshi, i cili bashkë me Ukë Rugovën, të birin e preisdentit të ndjerë, Ibrahim Rugova, ditë më parë publikuan Listën "LDK - Ibrahim Rugova".
Pjesa e parë e Kuvendit ishte e hapur për publikun dhe u transmetuaa direkt në televizionin publik të Kosovës, ndërsa sç njoftohet, pjesa vijuese e Kuvendit do të jetë e mbyllur.