“Wikipedia” në kërkim të imazheve nga Kosova

Prishtinë, 14 nëntor – Fotografi nga bjeshkët e Rugovës, manastireve, qytetit të Prizrenit, vendbanimet rurale e ato urbane, të cilat reflektohen përmes ndërtesave të ndryshme, do t’i prezantohen botës përmes enciklopedisë virtuale “Wikipedia”, shkruan sot gazeta Koha Ditore.
Një nismë e Gerar Meijssen, kontribuues i kësaj enciklopedie, nën menaxhimin e James Michael DuPont, ka për qëllim mbledhjen në një vend të imazheve më të mira nga Kosova dhe plasimin e tyre në “Wikipedia Kosova”. Ata tashmë kanë hapur një konkurs përmes rrjeteve të ndryshme sociale në internet, ku secili person që ka bërë fotografi në Kosovë mund t’i postojë ato.
“Kjo është një iniciativë që ka për qëllim të krijohet një ‘Wikipedia Kosova’ me anë të së cilës do të tregohen vendet, gjërat dhe pjesët më të mira të këtij shteti”, ka thënë DuPont, duke shtuar se ideja e kësaj iniciative ka ardhur pas një konference teknologjike të mbajtur në Vlorë të Shqipërisë.
“Në një konferencë për teknologjinë të mbajtur në këtë vend turistik, Gerar Meijssen, një person që është i lidhur me vetë projektin e “Wikipedias” ka dhënë idenë e promovimit të Kosovës dhe të Shqipërisë përmes kësaj faqeje”, ka thënë DuPont. Sipas tij, fotografitë që postohen në shumë rrjete sociale të internetit do të përzgjidhen dhe më të mirat do të postohen në “Wikipedia”.