LDD-ja themeloi degë në Podujevë

Podujevë, 14 nëntor - Lidhja Demokratike e Dardanisë themeloi sot degën e vet në Podujevë dhe me këtë rast kryetari i saj, Nexhat Daci tha se pas këtyre zgjedhjeve nacionale Llapi do te jete pjesa qendrore e Dardanisë.
“LDD dhe Daci do ta ndryshojnë në plotësi gjendjen ekonomike, të sigurisë, shëndetësisë dhe programeve sociale”, tha me këtë rast akademik Nexhat Daci.
“Prej Prishtinës deri këtu nuk pash asgjë që pushteti ose shtetit i Kosovës ka bërë për Llapin. Në tre vjet të pavarësisë së Kosovës, në të cilat Llapi ka participuar fuqishëm, nga ana e Qeverisë së Kosovës nuk është bërë asgjë për ketë regjion”, tha lideri i LDD-së.
Sipas liderit të LDD-së, Kosova në pikëpamje ekonomike nuk ka qenë kurrë më keq se sot. A mund të imagjinohet që para 20 e sa vitesh Kosova e ka siguruar bukën, ushqimin e vet, ndërsa në tre vjet pavarësi Kosova, gjykuar nga vlerësimet e Bankës Botërore, FMN-së dhe institucioneve tjera relevante ndërkombëtare, në gjendje të rëndë ekonomike.
Ai vlerësoi se është ora 12:05 dhe se populli në Kosovë duhet t’i hapë sytë dhe të mos lejojë që t’i vidhet shpirti për dhjetë euro, duke e shitur votën e vet.
Kryetar i degës së LDD-së në Podujevë u zgjodh Aza Shabani, nënkryetarë Blerim
Zhegrova e Bahri Jashari, ndërsa sekretare e degës Nesibe Zejnullahu.