Rossonerët okupojnë Milanon

Interi ka pësuar humbje në derbin më të madh lokal në botë, Derbi della Madonnina, ndaj Milanit me rezultat minimal 1-0.
Takimi në të cilin priteshin gola të shumtë, në fakt ishte një sfidë tejet e baraspeshuar, me Milanin që shfaqi lojë shumë më të mirë se rivali i përbetuar Inter, të cilit definitivisht po i mungon mentaliteti Mourinho.

Kthehemi në ndeshje. Milani fillon furishëm ndeshjen, pasi që në rastin e parë dhe në kontaktin e parë me top të ish-sulmuesit të Interit, Zlatan Ibrahimovic, shkaktohet një penalti nga Marco Materazzi. Përgjegjësinë e mori Zlatan ‘Ibracadabra’ që nuk u tremb nga tifozët Nerazzur përballë tij, duke qenë tejet i ftohtë nga pika e bardhë për 1-0 dhe epërsinë e hershme të Milanit.

Ashtu siç e kemi cekur në analizat ekskluzive për këtë derbi, epërsia e hershme e Milanit ishte vrasëse për Interin. Milani me presionin e lartë mbi mesfushorët e Interit dhe me Thiago Silvën që nuk e lejoi të lëvizë Militon, e diktoi ndeshjen.

Robinho ishte atraktiv për Rossonerët dhe gjëja e vetme që i mungoi ishte goli...

Përkundër epërsisë numerike në fushë, Interi nuk arriti që të barazojë rezultatin, falë një mbrojtje tejet solide nga skuadra kuq e zi me në krye sulmuesin Zlatan Ibrahimovic, i cili nuk u emocionua fare nga koreografitë speciale për të.

Pas javës së 12-të Milani e sheh veten në pozitën e parë me 26 pikë, një pikë më shumë se vendi i dytë Lazio dhe gjashtë më shumë se rivali i përgjakshëm Inter në pozitën e pestë.