Strukturat paralele okupojnë dy gjykata në Zubin Potok

EULEX-i ka pranuar një informatë këtë javë, e cila flet për okupimin që kanë nisur strukturat paralele serbe në veri të shtetit. Përmendet të jetë okupuar objekti i dy gjykatave–i Gjykatës Komunale dhe i asaj për Kundërvajtje në Zubin Potok.
Informata i është adresuar këtë të martë kreut të EULEX-it, Xavier Bout de Marnhac, nga kryesuesi i Këshillit Gjyqësor të Kosovës, Enver Peci.

Në shkresë, një kopje të së cilës e ka siguruar të premten “Koha Ditore”, theksohet se ky okupim është bërë me qëllim të shndërrimit të kësaj ndërtese në njësi të mjekësisë familjare.

“Sipas burimeve të mia, shndërrimi i kësaj ndërtese është bërë në bazë të vendimit nga strukturat paralele serbe të Kosovës, por as unë personalisht e madje as Këshilli Gjyqësor i Kosovës nuk jemi informuar zyrtarisht për ndonjë vendim të tillë”, thuhet në shkresën e Pecit për de Marnhac, dhe e cila u është përcjellë edhe përfaqësuesve të vendeve të Quintit. “KGJK është i vetmi autoritet në Kosovë që është përgjegjës për qeverisjen, menaxhimin dhe administrimin e gjykatave të Kosovës – të gjitha gjykatave në Kosovë.
Ne fuqishëm e kundërshtojmë shpronësimin ilegal të kësaj prone”.

Ndërtesa e gjykatës në Zubin Potok ka qenë funksionale deri në shkurt të vitit 2008 dhe në të gjenden lëndë. Në shkresën e kreut të KGJK-së thuhet për këto lëndë, se ato duhet të ruhen me çdo kusht. Po kështu theksohet se çfarëdo shpronësimi i pronës duhet të bazohet në ligj dhe ai të ndërmerret nga institucionet e autorizuara. /Telegrafi/