Vazhdon bllokada në Zubin Potok

Afaristët e Zubin Potokut kanë vazhduar të hënën bllokadën në rrugën magjistrale Mitrovicë-Ribariq, te fshati Zupçe në veri të Kosovës.

Kryetari i shoqatës së afaristëve në Zubin Potok, Ratomir Bozovic ka paralajmërua se të hënën do të sjellin vendim nëse do të radikalizohen protestat, duke bërë me dije se bllokada është e drejtuar kundër EULEX-it.

“EULEX-i nuk po bën zë në lidhje me kërkesat tona. Sot, me siguri, do të nisim me bllokada të përgjithshme njëorëshe dhe do të bllokojmë edhe rrugën e vetme alternative. Siç do të vijnë përgjigjet ashtu edhe do të sillemi”, ka thënë Bozovic për agjencinë Tanjug.

Ndryshe, afaristët serbë të Zubin Potokut, tashmë 12 ditë radhazi po mbajnë të bllokuar rrugën për shkak të arrestimit nga ana e EULEX-it të kolegut të tyre Jevrem Pantelic, i cili dyshohet për përzierje në krim të organizuar. /Telegraf