Në Graçanicë ndërtohet spitali i ri

Graçanicë, 15 nëntor – Në Graçanicë ka filluar ndërtimi i një spitali, njofton agjencia serbe e lajmeve B92. Sipas këtij burimi në këtë pjesë të Kosovës jetojnë rreth 20 mijë serbë. Ata aktualisht mjekohen në spitalin ekzistues në Graçanicë, i cili, sipas B92 financohet nga qeveria e Serbisë, por në kushte hapësinore të papërshtatshme. Mirëpo, kjo agjenci paragjykon se në këtë spital që po ndërtohet zor se do t’u lejohet mjekëve serbë të punojnë, meqë financohet nga qeveria e Kosovës.

Ndërtimin e spitalit me mbi 7 mijë metra katrorë, në të cilin do të ketë 250 shtretër, 12 salla operacionesh, e ka iniciuar komuna e sapoformuar e Graçanicës, ndërkaq sigurimin e mjeteve për ndërtimin e spitalit e ka ndihmuar ministri i Punës dhe i Mirëqenies sociale në qeverinë e Kosovës, Nenad Rashiq.

Ndërtimi i spitalit duhet të përfundojë brenda 2 vjetësh. Në të do të ketë vend për të gjitha ata që tani punojnë në spitalin “Simonida”, po ashtu në Graçanicë.