Martohen çdo dy ditë

Derisa disa çifte heqin të zitë e ullirit për të mbërritur tek altari, britaniku Mark dhe bashkëshortja e tij, australiania Denisse Duffield-Thomas, i thanë njëri tjetrit “PO”, para altarit hiq më pak se 83 herë. Ata shpresojnë se do të martohen 100 herë.
Momentalisht janë në të njëjtën pozitë me rekorderët e deritashëm të Guinnessit. Çifti kishte fituar garën për punën e testimit të lokacioneve më të mira për martesë dhe vendeve më të përshtatshme për muajin e mjaltit të firmës irlandeze “Runaway Bride and Groom” (“Nusja dhe dhëndëri që braktisin altarin”). Për këtë punë kishin konkurruar 30.000 njerëz.

Herën e fundit ata janë martuar në një klub të plazhit australian Port Douglas Peppers të premten. Qifti për herë të parë është martuar në Britaninë e Madhe në gusht të vitit të kaluar, ndërsa pas kësaj ata kishin organizuar dasmën në një plazh të Australisë.

Në gjashtë muajt e fundit ata ripërtërinë betimin e martesës në të gjitha vendet më interesante të botës, shpella, laguna, rrënoja të kishave. Fotografitë e ceremonisë së martesës i publikojnë në blogun e tyre.