Deputetja shqiptare shoqërohet në stacionin policor në Prizren

Policia kufitare në Vërmicë ka shoqëruar për në stacionin e policisë në Prizren deputeten e Partisë Demokratike në Parlamentin e Shqipërisë, Albana Vokshi, kur kjo e fundit ka tentuar të kalojë pa radhë në pikëkalimin kufitar të Vërmicës. Ndërkohë që Gjykata Komunale e Prizrenit e ka lënë të lirë deputeten Vokshi, pasi i ka shqiptuar një gjobë prej 200 eurosh.
Burime të policisë kufitare në Prizren kanë bërë të ditur se ngjarja ka ndodhur rreth orës 13:30 të ditës së diel, kur deputetja Vokshi bashkë me bashkëjetuesin e saj, Arjan Tartari, dhe një zyrtar të lartë të Ministrisë së Kulturës po shkonin për në Kosovë. Të njëjtat burime bëjnë të ditur se shtetasja shqiptare, Albana Vokshi, nuk është identifikuar si deputete.

“Nisur edhe nga radhët të krijuara në pikëkalimin kufitar, Albana Vokshi ka kërkuar lehtësim procedurash, duke mos iu bindur urdhrave të policisë për të mbajtur radhën, duke ashpërsuar njëherazi tonet me punonjësit e policisë që shërbejnë në pikëkalimin kufitar të Vërmicës”, njofton Koha.

Ndërkohë që policia e Prizrenit ka bërë të ditur në mënyrë zyrtare shoqërimin në polici të deputetes Albana Vokshi dhe dërgimin e çështjes në mënyrë të përshpejtuar në Gjykatën Komunale të Prizrenit. Te njëjtën gjë e ka pohuar për mediat edhe zëdhënësi i Policisë së Kosovës, Baki Kelani, por pa dhënë detaje.

Pas gjykimit të përshpejtuar, Gjykata Komunale e Prizrenit ka vendosur një gjobë me vlerën prej 200 eurosh për deputeten Albana Vokshi, duke urdhëruar lirimin e saj, me argumentin se “vepra penale e dyshuar nuk paraqet rrezikshmëri”