Koalicioni PDK-AAK në Prizren, me pëlqimin e shefave

Aleanca për Ardhmërinë e Kosovës, të shtunën i ka ra pishman për të gjitha akuzat në drejtim të PDK-së për keqqeverisje. “Me pëlqimin e shefave”, të shtunën kanë lidhur koalicion për të bashkëqeverisur Komunën e Prizrenit dhe kanë marrë dy dikastere në drejtimin e ekzekutivit lokal.
Ramadan Muja, kryetar i Komunës dhe njëherësh kryetar i degës së PDK-së në Prizren,
ka thënë se marrëveshje me AAK-në lidhet për të forcuar qeverisjen e Prizrenit në të mirë të qytetarëve. “Unë mendoj se më në fund edhe AAK-ja i tregoi qytetarit, sikurse Partia Demokratike, se respekton votën e qytetarëve. Dhe është në interesin e qytetarëve dhe partisë të respektohet besimi që kemi marrë të gjithë se bashku nga votuesit tanë”, ka deklaruar Muja, pasi ka hedhur firmën mbi marrëveshjen e koalicionit.
Ndërsa Bislim Zyrapi, kryetar i degës së AAK-së, që më shumë se një herë Mujën e ka cilësuar si kokën e të këqijave në Prizren, me këtë rast ka thënë se kanë vendosur të bashkëqeverisin me PDK-në, sepse është në interes të qytetarëve. “Ne sot bëmë një marrëveshje që është në të mirën e qytetarëve të Prizrenit, përmes së cilës do të bashkëqeverisim me PDK-në dhe e cila do të sjellë qeverisje më të fuqishme për Prizrenin në përgjithësi si komunë”, ka thënë pos tjerash Zyrapi.
Ai ka pohuar se për koalicion me PDK-në në ekzekutivin komunal kanë pëlqimin e shefit të partisë. “Kjo është marrëveshje në nivel lokal. Ndërsa niveli qendrore mbetet të vendoset se si do të bëhet. Ne vetëm mund të japim një shembull.... Normalisht që kemi pëlqimin e shefave, pa pëlqimin e tyre nuk mund të hyhet. E kemi pëlqimin nga niveli qendror”, ka pohuar Zyrapi.
Nga ana tjetër, Zafir Berisha, i cili qe për një kohë të gjatë ka drejtuar PDK-në e
Prizrenit, kurse pas krijimit të partisë së tij, në zgjedhjet e fundit nacionale ka pasur koalicion me AAK-në, marrëveshjen e ka cilësuar si Pazar mes individëve pa vizione politike.