Rihapet shkolla teologjike serbe në Prizren

Me regjistrimin e dhjetë nxënësve në klasën e parë të shkollimit të mesëm, të hënën ka rinisur punën seminari kishtar "Shën Qirili dhe Metodi" në Prizren, e njohur si Bogosllovia. Ajo kishte pezulluar veprimtarinë e vet në qershor të vitit 1999, duke e bartur aktivitetin në Nish, Serbi.Në prani të nxënësve, prindërve, mësimdhënësve, përfaqësuesve të institucioneve ndërkombëtare, klerikëve ortodoksë dhe peshkopit të dioqezës së Rashkës e Prizrenit, Teodosije simbolikisht është shënuar kthimi në objektin e seminarit, i cili pjesërisht është rindërtuar në saje të donacioneve të Komisionit Evropian dhe të Qeverisë së Kosovës.

Në ceremoninë modeste, peshkopi Teodosije është shprehur i kënaqur dhe i lumtur me mundësinë e dhënë për rinisjen e punës së këtij institucioni arsimor-kishtar, duke e cilësuar këtë ditë si të rëndësishme jo vetëm për Kishën Ortodokse Serbe, por edhe për vetë qytetin e banorët e Prizrenit.

Sipas historianit Abib Ahmedi, shkolla fetare ortodokse në Prizren ishte themeluar më 1 tetor të vitit 1871, ndërsa zyrtarisht ka nisur punën më 10 gusht të vitit 1872.