Pretendime të rrejshme serbe për vjedhje të kishës në Prizren

Policia e Kosovës ka mohuar të shtunën se plumbi në pullazin e Kishës ortodokse në Prizren, për të cilin ka bërë akuza Beogradi, është vjedhur gjatë këtij muaji, por mungon, së paku, që nga viti 2007, shkruan Koha Ditore.
I ashtuquajturi ministër i Serbisë për Kosovën, Goran Bogdanoviq, ka akuzuar se më 13 të këtij muaji ishte vjedhur plumbi në pullazin e kishës ortodokse serbe “Bogorodica Levishka”, në Prizren. Zëdhënësi i Policisë së Kosovës, Brahim Sadriu, mohon.
“Në momentin kur e ka marrë Policia e Kosovës në sigurim këtë objekt fetar është bërë fotografimi i objektit dhe që nga momenti i pranimit të këtij objekti nga KFOR-i, ky objekt nuk ka pësuar asnjë ndryshim. Fotot e momentit të marrjes së objektit, të cilat i posedojmë ne, janë të njëjta me gjendjen momentale të pullazit dhe kishës së lartshënuar. Dhe këto foto janë dorëzuar tek hetuesia, e cila po merret me këtë rast”, ka thënë zëdhënësi i Policisë, Sadriu.
Bogdanoviq akuzat e tij i ka bërë në kohën që Prishtina dhe Beogradi janë duke zhvilluar dialog të ndërsjellë, në të cilin do të trajtohet edhe çështja e trashëgimisë kulturore në Kosovë.
Sipas zëdhënësit Sadriu, Policia e Kosovës objektin e Kishës ortodokse serbe në Prizren e ka marrë nga KFOR-i, nën kujdes dhe sigurim më 13 shkurt 2009, dhe sigurimi i kishës bëhet 24 orë në ditë dhe shtatë ditë në javë. Por, sipas Sadriut, megjithatë Policia e Kosovës është duke i hetuar në hollësi thashethemet që kanë qarkulluar këto ditë në mediumet serbe dhe në disa media kosovare.