Kosumi rrëfen udhëtimin nga AAK në PDK

Prishtinë, 17 nëntor - Ish kryeminstri i Kosovës, Bajram Kosumi, ka rrëfyer përvojën e tij në politikë, si kryeministër, ndarjen e tij me AAK-në dhe bashkimin në PDK.
Gjatë një interviste për emisionin Interaktiv të KTV-së, ai ka folur edhe për arsyet që quan në dorëheqjen e tij duke ua hedhur tërthorazi fajin ndërkombëtarëve. Arsyeja e vetme, sipas Kosumit, është “ se ai insistonte ta dinte afatin e përfundimit të negociatave, të cilat dihej se do të fillonin, por nuk u dihej fundi”. Kosumi ka shtuar se ka mundur të merrte çfarëdo vendimi, por insistimi i tij për të përcaktuar afate kohore për statusin ka qenë kryesore e krijimit të pakënaqësive tek ndërkombëtarët.
Një arsye shtesë, sipas tij, ka mund të jetë edhe ideja se kush do ta mbaj flamurin e pavarësisë. Ai ka thënë se ka tre vjet që nuk ka qenë pjesë e vendimmarrjes në AAK sepse Aleanca sot nuk është partia për të cilën ishte themeluar. “Nuk mund ta definoj sot si ish-themelues i AAK-së. Nuk e njoh. Nuk u themelua të përfundonte kësisoj”, ka thënë Kosumi.
Kosumi ka folur edhe për përfshirjen e tij në listën e PDK-së për zgjedhjet e dhjetorit. Armiqtë e dikurshëm janë bërë miq në politikë, por Kosumi ka preferuar t’i quaj miq të gjithë politikanët e Kosovës e që, sipas tij, “i dallon me ta vetëm koncepti politik”. “Përfshirja ime në listën e PDK-së nuk është e rastësishme. Unë me shumicën prej tyre njihem që prej vitit 1980. Kam kaluar shumë kohë burg me disa drejtues të PDK-së, si Gani Kocin e Ramadan Avdiun, disa të tjerë i kam pasur bashkëpunëtorë në Partinë Parlamentare, ndërsa pas luftës kam qenë ministër në Qeverinë e Përkohshme të Hashim Thaçit”, ka thënë Kosumi.