Bajram Kosumi krijon Iniciativën Qytetare për Demokracinë

Prishtinë - Nënkryetari aktual i AAK-së, Bajram Kosumi, duket se ka ndërruar mendje për mënyrën se si do të vazhdojë rrugëtimin e tij në politikë. Burime të Kosovaonline bëjnë të ditur se Kosumi ka hequr dorë nga ideja që para zgjedhjeve të ringjallë Partinë Parlamentare të Kosovës, duke zgjedhur formatin e iniciativës qytetare për të garuar në këto zgjedhje.

Ajo që tashmë është e sigurt, Kosumi nuk do të garojë në zgjedhje më nën logon e AAK-së, ndërsa mundësia e vetme për kohën e mbetur, është krijimi i një iniciative qytetare e cila do të mblidhte përkrahësit e tij brenda dhe jashtë AAK-së.

Nismëtarët e saj kanë thënë se Iniciativës Qytetare për Demokraci pritet t'i bashkëngjitën edhe një pjese e intelektualëve që nuk janë te angazhuar në politikë dhe struktura të AAK-së.

Kosumi ka nisur konsultat për krijimin e kësaj iniciative, që pritet të publikohet gjatë kësaj jave, e cila do të emërtohet “Iniciativa Qytetare për Demokracinë”, ndërsa pjesë e saj do të jenë ish PPK-istët si Merxhan Avdyli, Bujar Dugolli, etj.

Ndryshe, Kosovaonline mëson se Iniciativa Qytetare për Demokracinë me t’u krijuar do të synojë bashkëpunimin në formën e koalicionit parazgjedhor me Partinë Demokratike të Kosovës apo Aleancën Kosova e Re, për çka ideatorët të saj veç kanë nisur takimet me drejtues të lartë të këtyre partive.

Takime të tilla gjatë javës që lamë pas, Kosumi ka zhvilluar me kreun e PDK-së, Hashim Thaçi dhe presidentin e AKR-së Behgjet Pacolli ku është diskutuar për mundësitë e bashkëpunimit.