Thaçi e Jahjaga urojnë Tërnavën për Bajram

Me rastin e Festës së Fitër Bajramit, kryeministri i Republikës së Kosovës, Hashim Thaçi ka vizituar sot Bashkësinë Islame të Kosovës, ku është pritur nga kryetari Naim Tërnava. Tërnava ka pritur të martën edhe presidenten Atifete Jahjaga

Kryeministri Thaçi ka përgëzuar kryetarin e Bashkësisë Islame të Kosovës, Naim Tërnava dhe të gjithë besimtarët islamë për Festën e madhe të Fitër Bajramit, duke vlerësuar lartë vlerat e shfaqura gjatë Muajit të shenjtë të Ramazanit, muaj që po kurorëzohet me Festën e Fitër Bajramit.

“Festa e Fitër Bajramit është festë e paqes, e solidaritetit, harmonisë, dashurisë dhe respekti të ndërsjellë në familje, në shoqëri dhe në tërë komunitetin tonë”, u shpreh kryeministri Thaçi, transmeton “koha.net”.

Kryeministri Thaçi ka shprehur bindjen se çdo festë Kosovën do ta gjejë edhe më të përgatitur, për t’u bërë pjesë e institucioneve euroatlantike.

Presidentja Jahjaga, gjatë vizitës në BIK, u shpreh se kjo është festë tradicionale, një nga shtyllat e besimit, të përkushtimit, të vullnetit, të ndihmës dhe të përkrahjes.

Jahjaga tha se BIK është duke e luajtur një rol përparimtar, gjatë gjithë kohëve kyçe për fatin dhe për historinë tonë.

“Këtë rol jam e bindur plotësisht se do ta ketë edhe në të ardhmen, në kohët dinamike nëpër të cilat po kalojmë në rrugën e integrimeve euroatlantike”, tha ajo, transmeton “zëri.info”.

Kërkesa e BIK-ut për ndërtimin e një xhamie më të madhe ose e një qendre islamike në Prishtinë, siç tha presidentja Jahjaga, është e drejtë dhe ajo do të gjen përkrahje. Ndërsa, procedurat e gjetjes së lokacionit dhe të ndërtimit, sipas saj, duhet të harmonizohen dhe të sjellin dobi dhe të mira për të gjithë. /Telegrafi/