Vazhdojnë problemet financiare të Irlandës

Bruksel, 17 nëntor - Komisari evropian i çështjeve financiare, Oli Rehn, deklaroi se në vijim është përgatitja e programit për ndihmë financiare, e cila do të mund t’i ofrohej qeverisë irlandeze. Rehn, deklaroi kështu në fund të takimit të ministrave të financave të BE-së në Bruksel, ku u diskutua për krizën me të cilën po ballafaqohet Irlanda. Ai shtoi se autoritetet irlandeze kanë premtuar se do të bashkëpunojnë me Bashkimin Evropian dhe organizatat e tjera ndërkombëtare. Oli Rehn, tha se si pasojë e shqetësimeve për problemet irlandeze, Evropa duhet të përmbahet nga paniku. Takimi i ministrave të financave të eurozonës përfundoi pa miratim të kurrfarë plani konkret të aksionit. Paraprakisht, kryetari i BE-së, Herman Van Rompuy, paralajmëroi se bëhet fjalë për të ardhmen e krejt BE-së, ngase kriza financiare në Portugali dhe në Irlandë po shkakton shqetësime të mëdha. Mund të ndodh që këto dy shtete të detyrohen që të kërkojnë ndihmë nga BE-ja për të nxitur pak ekonominë e vendit dhe sektorin bankar.