‘Fryma e Re’ takon ambasadorin Dell

Krerët e Partisë Fryma e Re, Shpend Ahmeti dhe Ilir Deda takuan të enjten ambasadorin amerikan në Kosovë, Christopher Dell, ndërkaq gjatë këtij takimi thuhet se kanë diskutuar lidhur me zhvillimet e fundit në vend rreth mbarëvajtjes së zgjedhjeve, më 12 dhjetor.
Në njoftimin për media të FER-it, thuhet se në takimin e tyre të parë zyrtar me përfaqësuesin diplomatik të Shteteve të Bashkuara të Amerikës, përfaqësuesit e partisë ‘Fryma e Re’ shprehën mirënjohje për rolin që SHBA-të e kanë luajtur vazhdimisht në mbështetjen për shtetin e Kosovës, dhe poashtu për gatishmërinë që edhe më tutje të qëndrojnë pranë shtetit më të ri në botë.

‘Fryma e Re’ ka potencuar rëndësinë që zgjedhjet e para parlamentare në Kosovë të jenë të lira dhe demokratike.

“Duke qenë se këto janë zgjedhjet e para parlamentare që mbahen në Kosovën e pavarur, në këtë takim me Ambasadorin Dell, ne kemi përsëritur kërkesën tonë që bashkësia ndërkombëtare, brenda kompetencave që ka, ta luaj rolin e vet për të siguruar që me 12 dhjetor 2010 të zhvillohet një proces i lirë dhe demokratik,” ka thënë Shpend Ahmeti, kryetar i Këshillit drejtues të “Frymës së Re”.

“Fryma e Re” gjatë ditëve në vijim u tha se do të takojë edhe ambasadorët e vendeve të tjera që veprojnë në Kosovë.