Nga titulli i Vettelit përfitojnë edhe pastruesit

Berlin, 20 nëntor - Piloti gjerman Sebastian Vettel, me fitimin e titullit të kampionit në Formula 1, u ka sjellë fitime të gjithë punëtorëve të skuderisë së tij, Red Bull. Nga triumfi i Vettelit kanë përfituar edhe pastrueset e Red Bullit. Çdo pastruese në fabrikën e Red Bullit në Milton Keynes të Anglisë ka fituar 12 mijë euro, shkruan gazeta gjermane "Bild" të premten.
Natyrisht, për pilotët Sebastian Vettel e Mark Webber dhe ekipin e inxhinierëve përfitimet materiale kanë qenë më të mëdha. Inxhinierët kanë marrë nga 50 mijë euro. Në përgjithësi, Red Bull ka ndarë gjashtë milionë euro për punëtorët e vet. Gjysma e kësaj shume i takoi vetë Vettelit.
Këto shpërblime kanë ardhur pasi skuderia Red Bull, falë titullit të konstruktorëve, ka fituar një premi prej 70 milionë dollarëve nga buxheti i Formula 1.
Për Vettelin të ardhurat nga skuderia e tij nuk janë të vetmet. Ai ka nisur të fitojë shuma të mëdha parash nga sponsorët. Vetteli ka firmosur kontrata milionëshe me firmat "Procter & Gamble" dhe "Head & Shoulders".
Vetteli 23-vjeçar në fundjavë është bërë kampioni më i ri në histori të Formula 1. Njëherësh, ai është gjermani i parë pas legjendës Michael Schumacher që ka fituar titullin në F1. Ky i fundit mban rekordin me shtatë tituj.
Vetteli titullin e kampionit të Formula 1 e fitoi në garën e fundit pas triumfit në Abu Dhabi. Ai para garës së fundit renditej i treti, pas Fernando Alonsos (Ferrari) dhe Mark Webberit (Red Bull).