Haxhi ngre në qiell Lorik Canën

Stamboll, 19 nëntor - Që George Haxhi e ka vlerësuar gjithnjë paraqitjen e Lorik Canës, kjo është një gjë që tashmë dihet. Me të marrë në dorë timonin e Galatasarayt, trajneri i ri rumun i skuadrës gjigante turke kërkoi menjëherë ndihmën e mesfushorit shqiptar, i cili nga tekniku i mëparshëm, holandezi Frenk Raajkard ishte gozhduar në pankinë.

Por tashmë ka ardhur koha që të marrë edhe komplimentet e Haxhit, i cili e ka ngritur në qiell pas ndeshjes së javës së fundit, edhe pse Galatasaray humbi. Menjëherë pas përfundimit të takimit, trajneri rumun i është afruar mesfushorit shqiptar, të cilin e ka komplimentuar për paraqitjen shumë të mirë në fushën e lojës, duke e evidentuar si shumë efikas shpirtin e tij tepër luftarak.

“Ka zhvilluar një ndeshje me mish e me shpirt. Ka dhënë maksimumin në fushë dhe ka luajtur me zemër. Është një luftëtar i vërtetë”, ka thënë Haxhi më pas për gazetarët. Cana ishte i vetmi lojtar i Galatasarayt që mori komplimente nga Haxhi, shkruan TCH.