Shfrytëzuesit e iPhone më të kënaqurit

Afërsisht një e treta e pronarëve të telefonave të mençur do të blinin iPhone po që se ai do të ofrohej në ofertën e operatorëve të tyre telefonik.
Kompania ChangeWave ka kryer edhe një hulumtim lidhur me kënaqësinë e shfrytëzuesve të telefonave të mençur (smartphones) me pajisjet e tyre.

Në hulumtim janë anketuar 1.212 përdorues në Shtetet e Bashkuara të Amerikës të cilët kanë blerë telefon të mençur gjatë gjashtë muajve të fundit dhe janë pyetur se sa janë të kënaqur me blerjen e tyre.

Sikur në të gjitha hulumtimet e deritanishme Apple iPhone ka qenë në maje të listës për kah kënaqësia e përdoruesve me 77% të atyre të cilët kanë deklaruar se janë shumë të kënaqur me pajisjen. Motorola është në vendin e dytë me 71% shumë të kënaqur, pasuar nga HTC (63%), Samsung (45%), dhe RIM (44%).

ChangeWave gjithashtu ka pyetur shfrytëzuesit e telefonave të mençur të cilët nuk janë në rrjetin mobil AT&T nëse do të merrnin një iPhone në rast se ai do të ofrohej tek operatori i tyre.

Në fakt, iPhone në SHBA ofrohet vetëm nga operatori i telefonisë mobile AT&T dhe nuk është në dispozicion në versionin për rrjetet mobile CDMA të cilat i shfrytëzon operatori udhëheqës i telefonisë mobile në SHBA - Verizon Wireless. Kanë qenë 46% të anketuarve të cilët janë përgjigjur se megjithatë do të blinin pajisjen të cilën tani e përdorin, derisa 34% kanë thënë se do të merrnin një iPhone nëse do të ishte në shitje.